Nagtalinaed a nakalista ni Vice President Sara Duterte kas stockholder ken miembro ti board of directors ti Metro City Chow Foods Corp. manipud 2022 agingga 2025, maibasar kadagiti rekord ti Securities and Exchange Commission (SEC) a naidatag iti impeachment trial-na.
Iti testimonia ni SEC Company Registration and Monitoring Department Director Atty. Gerardo del Rosario, nakailanad iti General Information Sheets nga adda 500 shares ni Duterte ken tinawen a nakalista kas director iti nasao a kompania.
Inlawlawag pay ni Del Rosario dagiti probision ti 1987 Constitution a mangiparparit iti Presidente, Bise Presidente ken dadduma pay a nangato nga opisial a makipaset iti negosio wenno maaddaan iti financial interest kadagiti sumagmamano a kontrata ken prebilehio ti gobierno bayat nga adda iti puesto.
Kabayatanna, paset ti Article 2 ti impeachment case ti alegasion a saan nga ag-divest ni Duterte iti business interest-na ken saanna a naideklara amin dagiti dadduma nga assets iti SALN-na.
