Pinasingkedan ti National Bureau of Investigation nga imbestigaranda dagiti sumagmamano a vlogger ken online content creator a mapapati a karaman iti panagkikil kasukat ti kuarta.
Segun ken ni NBI Director Atty. Melvin Matibag, kitkitaen ti ahensia dagiti dadduma pay nga indibidual nga adda met laeng kasta nga aramidna kalpasan ti pannakakemmeg dagiti sumagmamano a miembro ti maysa nga online media network gapu iti kaso nga extortion.
Maibasar kadagiti report, mapapati a nagkiddaw dagiti suspek iti P300 million manipud iti maysa a dati a House Speaker kasukat ti saan a panangiruar iti video a mangimameg kenkuana iti korapsion.
Pinaglibakan met ti maysa kadagiti nakemmeg ti pammabasul ket kunana a daytoy ket maysa laeng a set-up ken isyu iti freedom of the press ngem impaganetget ti NBI a natibker ti ebidensiada ken awan pakainaigan ti pulitika iti operasion.
