Natalek ni Senador Bam Aquino a mapondoan a nasayaat ken maipatungpal a husto dagiti napapateg a programa iti edukasyon kas iti panagpatakder iti classroom ken panangpapigsa ti school-based feeding program kalpasan iti pannakaaprubar ti 2026 national budget.
Segun ken ni Aquino a chairperson iti Senate Committee on Basic Education, babaen dayta ket mapondoanen ken maipatungpal a husto dagiti napapateg a programa a makatulong tapno mapapigsa ken mapasayaat ti sektor iti edukasyon.
Kinuna ni Aquino nga addan ti pondo iti panagpatakder kadagiti classroom, nayon a budget para iti school-based feeding program ken libre a kolehio ken dadduma pay a napapateg a suportar para kadagiti agad-adal tapno masigurado a nasayaat iti panagbasada.
Karaman iti P1.34 trillion a pondo para iti edukasyon nga isu ti kadakkelan iti pakasaritaan iti pagilian ti P68 billion para iti pagpatakder kadagiti baro a classroom ken P25.6 billion para iti panagpalawa ti School-Based Feeding Program.
Nangilatang pay ti budget ti P67 billion para iti pannakaipatungpal ti Republic Act No. 10931 wenno ti linteg iti libre a kolehio nga intuding ni Aquino.
