VIGAN CITY – Maysa a vintage cannon wenno artillery iti natakaw iti maysa a pagtaengan idiay Barangay Lacong, Tagudin.
Iti pannaki-uman ti Bombo Radyo Vigan ken ni PCMS Lorenzo Cariaga iti Tagudin Municipal Police Station, impakaammo ni Carol Felisa Ocampo Encarnacion, agtawen iti innem a pulo ket uppat, naasawaan, physician nga agnaed iti nasao a lugar inaig iti pannakapukaw iti vintage cannon-na nga inted daydi amana a ni Dr. Antonio Encarnacion, a nakadisplay iti sangwanan iti pagtaenganda.
Segun ken ni Cariaga, pinasingkedan ti caretaker iti nasao a pagtaengan a ni Beatriz Pabiona Berido, agtawen iti limapulo ket innem a sakbay a napukaw iti vintage cannon ket namin-tallo a daras a nagturong iti nasao a pagtaengan ni Roderick Artillaga Hernando, agtawen iti tallopulo ket pito, naasawaan, antique buyer nga agnaed idiay Barangay Garitan, Tagudin ket nangala iti ladawan iti vintage cannon isu a sinitarda.
Ngem idi August 15 iti agdama a tawen iti alas dos iti parbangon, bayat ti panangisagana ni Berido iti taraon iti kusina iti pagtaengan ni Encarnacion ket adda iti nanggegna a sabsabali nga uni ngem saanna a pinansin, ngem iti alas sais iti bigat iti nasao met laeng nga aldaw, simmangpet ti kaduana a caretaker a ni Rene Ramos ket napansinna nga awan iti cannon.
Naamoan a nag-post iti ladawan iti social media ti suspek inaig iti panagilakona iti nasao a cannon ket ilaklakona pay iti gatad a P30,000.
Dukduklaten dagit otoridad nu siasino dagiti posible a kakadua ti suspek ta saan a kabaelan ti maymaysa a tao a mangbagkat dayta ta kasapulan iti uppat wenno nasursurok pay gapu iti kinadagsenna.
Nupay kasta ket maisagsaganan dagiti dokumento a kasapulan para iti pannakaipila iti kaso kontra iti suspek.
Kabayatanna, nagpalagip ni Cariaga kadagiti umili a nu adda napapateg nga alikamen kadagiti pagtaengan ket agbalin a naalibtak ken nu bilang adda iti insidente ket insigida nga ipakaammo kadakuada tapno maliklikan iti saan a nasayaat a pasamak.
VOICE CLIP OF PCMS LORENZO CARIAGA
