VIGAN CITY – Mayuswat ti Vigan Food and Trade Expo idiay Taguig City inton May 21-31 partikular iti Villa Fernandina de Vigan, 170 Manuel L. Quezon Street, Bagumbayan saan laeng a tapno matulongan dagiti bassit a negosyo no di ket tapno maikkan gundaway dagiti taga-National Capital Region a makagatang iti produkto ti Ilocos Sur.
Iti pannaki-uman ti Bombo Radyo Vigan ken ni Cooperative Officer Hermie Etrata, nakairuamanen dagiti taga-Vigan ti makipaset iti Food and Trade Expo ngem gapu ti pandemya ket dua a tawen a saanda a nakapan.
Saan nga adu dagiti makipaset ta limitado laeng para kadagiti taga-Vigan ti nasao a banag isu nga adda laeng dua a mapan aglako iti empanada, saggaysa ti aglako iti souvenir ken delicacies idinto a ti adu ket dagiti aglako iti furniture agsipud ta isu ti daydaywen dagiti residente iti Taguig.
Narugian ti nasao a proyekto sipud pay nagtugaw ni dati a Vigan City Mayor Eva Medina ta ti gagemna ket mayasideg ti city government babaen kadagiti residente iti Vigan City dagiti produkto nga ipampannakkel ti probinsia kas ti Bagnet, Longanisa, Furniture, Abel Iloco, Bibingka, Sinanglao, Miki, Empanada, Okoy, Souvenir ken dadduma pay.
