Vigan City, saan a mai-lockdown gapu ti COVID – 19

VIGAN CITY – Saan nga agpayso nga ipasarra ni Vigan City Mayor Juan Carlo Medina ti tiyendaan ti Vigan ken nangnangruna a saan nga agpayso iti agwarwaras a damag nga ideklerar na ti lockdown ditoy syudad.

Segun ken ni Medina, saan a ti Vigan City iti nangisara iti borders kadagiti sabali nga ili nu di ket dagiti sabali nga ili kas ti Caoayan ken Sta. Catalina iti nangisara dagiti borders da para kadagiti agindeg ditoy Vigan City.

Adda dagiti naawat na a reklamo babaen kadagiti kinataripnong na a barangay chairman a saan nga ipalubos ti Caoayan a makastrek iti ili da a mapan makitiyenda ken ag-grocery iti lugar da dagiti taga- Vigan nangruna dagiti taga- Salindeg ken kabangibang a barangay, kasta met laeng dagiti taga- Pantay a maparitan a sumrek a mapan makitiyenda idiay Sta. Catalina public market.

Agsipud iti dayta, kidkiddawen ni Medina kadagiti lokal a gobyerno ti Caoayan ken Sta. Catalina nga ipalubos da a sumrek kadagiti luglugar da dagiti taga- Vigan agsipud ta nawaya met a makastrek dagiti taga- Caoayan ken taga- Sta. Catalina ditoy syudad nangruna iti tiyendaan.

Kabayatanna, kayat ti mayor a nu mabalbalin ket saanen a mapan aglako wennu mapan makitiyenda idiay Vigan City public market dagiti senior citizens agsipud ta narisgo da ti COVID- 19.

Inlawlawag na a nu adda dagiti kakabagyan wennu kameng ti pamilya dagiti senior citizen ket isu iti ibaon da a mapan aglako wennu mapan makitiyenda tapnu saanen a rumuwar pay dagiti babbaket ken lallakay kadagiti pagtaengan da.