Nainaganan ti UNESCO World Heritage City ti pagilian a Vigan kas maysa kadagiti top destinations iti Asya para iti tawen 2025.
Maibasar iti Travel and Leisure Asia, maikawalo ti Vigan City kadagiti duapulo ket lima a best places to visit iti Asia ita a tawen.
Iti pannaki-uman ti Bombo Radyo Vigan ken ni Ilocos Sur Provincial Tourism Officer John Noel Andaya, pakaragsakanda a mairaman ti Vigan City kadagiti top destinations in Asia ta ipasimudaagna ti agtultuloy a panangikagumaanda a mapasayaat ti turismo ti siudad.
Gapu dayta, impasigurado ni Andaya a ma-yupgrade dagiti facility tapno napimpintas pay ti padas dagiti umay a turista ken ikagumaanda a mapaalisto ti Vigan City airport tapno ad-adu pay a gangannaet a turista ti makapasiar iti siudad.
Ti Vigan City ket nalatak gapu iti Spanish colonial architecture-na a mangiparikna iti nabaknang a pakasaritaan ken kultura ti pagilian.
Dagiti sumagmamano a napintas a pagpasiaran ket ti Calle Crisologo, Syquia Mansion Museum, Plaza Salcedo’s Dancing Fountain ken Pottery.
