Nagballaag ti Vigan City Health Office iti publiko maipanggep kadagiti peggad nga ipaay ti panagaramat iti paputok.
Iti pannaki-uman ti Bombo Radyo Vigan ken ni Dianne Erica Ilaban Aquino, City Health Nurse, ti panagpaputok ket mabalin a mangitunda iti pannakaputed ti ima ken ramay; pannakabulsek/pannakairita ti mata; panagtuleng; permanente a sakit ti bara ken dadduma a paset ti bagi gapu iti kemikal; ken pannakatay gapu iti kumplikayon.
No bilang nakatilmon iti paputok, balakad ni Aquino a saan nga ipilit nga ibakwar no di ket inomen ti raw egg white – 6-8 a piraso kadagiti ubbing ken 8-12 piraso kadagiti nataengan, sa ipan a dagus iti ospital.
No mata met ti naputukan, bugwan iti kalalainganna a bara ti danum, saan a kudkuden, agusar iti nadalus a tela wenno bandage a pangkalub ken mapan met laeng iti ospital.
Uray kadagiti dunor wenno pannakasinit gapu iti paputok ket nasken a mabugwan iti danum ken sabon, ken barabadan iti tela wenno bandage.
Nupay kasta, al-allukoyenna ti publiko nga imbes a paputok ti aramaten para iti panangsarabo iti baro a tawen, ket agaramat laengen kadagiti alternatibo a banag a mangpataud iti naariwawa nga uni.
