Mangisayangkat ti City Government of Vigan babaen iti City Youth and Sports Development Office babaen iti pannakibinnuligda iti PPSK Vigan iti Sports Training Program ita a summer ken school vacation.
Mangrugi ti programa inton April 11, 2026 agingga July 26, 2026, kada Sabado ken Domingo, manipud iti ala una y media iti malem agingga alas singko y media iti malem.
Mabalin nga agpili dagiti participant iti sports discipline-da kas ti Karatedo a maangay iti UCCP Gym, Barangay III; Kickboxing a maangay iti Max Fusion Wild Stallion Gym, Barangay IV; Wushu a maangay iti Max Fusion Wild Stallion Gym, Barangay IV; ken Table Tennis a maangay iti Hotel Linda Annex, Barangay VI.
Dagiti interesado a makipaset ket mangipasada iti School ID nga adda pakakitaan a taga-Vigan-da ken Certificate of Residency.
Limitado laeng iti 20 ti participant para iti Kickboxing ken Wushu, isu a maibalbalakad ti nasapa a panagpalista.
