VIGAN CITY – Indaulwan ni Transportation Secretary Arthur Tugade ti inagurasyon iti completed development projects iti Vigan Airport a pakairamanan ti napalawa ken napasayaat a terminal building, powerhouse ken kaadda ti runway features.
PHP76-M ti nailatang a pondo ti airport a dagiti ongoing project ket pakairamanan ti construction iti water tanks, vehicular parking area, cyclone wire perimeter fence, ken runway drainage system.
Inton 2023 ti manamnama a panangrugi ti operasyon ti Vigan airport a mabalinen a makaakomodar iti 150 a pasahero manipud iti dati nga ippat a pulo.
Segun ken ni Sec. Arthur Tugade, kas maysa nga Ilokano nga agkalkalikagum a makaibati iti legasiya, adu pay ti kayatna a maaramid iti Vigan airport kas ti pannakaextend ti runway iti maysa pay a kilometro ta uray dagiti airbus ket mabalin nga ag-landing.
Kabayatanna, pinasingkedan met ni Gov. Ryan Singson a ti inagurasyon iti Vigan airport ket mangipaneknek iti kari ken panagtitinnulong ti national ken local government tapno malag-anan dagiti umili ken rumegta manen ti tourism industry ti probinsia.
Nagyaman ti gobernador ken ni Presidente Rodrigo Duterte para ti pannakatungpal ti nasao a proyekto babaen ti Build, Build, Build Program ti administrasyonna.
