VIGAN CITY – Mapapati a video scandal ti rason ti nagpakamatayan ti maysa a senior citizen iti ili ti Santa.
Ti biktima ket ni Arnulfo Batara, agtawen ti innem a pulo ket walo, mannalon nga agnaed idiay Brgy. Rizal, Santa.
Iti pannaki-uman ti Bombo Radyo Vigan ken ni Police Captain Mark Bryan Corpuz, timmawag kadakuada ni Rosalie Corpuz Batara nga asawa ti biktima, impakaammona a nakabitin ti asawana iti kulungan ti kaldingda, ket idi inikkatna iti tali a nakabitinan ti asawana, ket isun ti pannakakitana ti homemade caliber 22 revolver iti makinkannigid a sikigan ti biktima.
Maibasar iti insayangkat a crime scene processing ti SOCO, malaksid iti pannakabekkel ti biktima ket adda nakitada a maysa a tama ti paltog iti kannigid a pispis ti biktima.
Segun ken ni Capt. Corpuz, agtultuloy iti imbestigasyon ket kitkitaenda nu adda foul play iti pasamak.
Impalubos met ti pamilia iti biktima a dumalan ti autopsy ti bangkay, tapnu makita a nasayaat no ania iti usto a napasamak.
VC- Police Captain Bryan Corpuz
Kabayatanna, sakbay a nakita ni Rosalie Corpuz Batara ti asawana ket napalaus iti panagdanagna ta saanna a mapasangpeten iti pagtaenganda isu a sinapulna ngem bayat ti panangbirbirokna ket nakitana laengen iti kulongan dagiti dingwen a nakabitinen babaen ti tali.
Segun ken ni Rosalie, saan nga agibagbaga iti parikot ti biktima ngem isuna mismo ti madanagan para ti asawana gapu kadagiti agduduma a pammadakes a naidanon kenkuana.
Patienna nga immuna nga inggalot ti biktima ti bagina ket nakabatay pay laeng iti tugaw ket insarunona a pinaltogan ti pispisna a gappuanan ti pannakaibitinnan.
Kinunana pay a ti paltog a naaramat ket manipod pay laeng iti Vintar, Ilocos Norte ket impagarupna a nabayagen a nai-dispose dayta ti asawana isu a nakigtot ta isu ti inaramatna a naggibusan ti biagna.
VC – ROSALIE CORPUZ BATARA
