VIGAN CITY – Impanamnama ni Vice Governor Ryan Singson iti kapulisan a sisusuporta ken nakasagana a tumulong ti Office of the Vice Governor kadakuada isu a kiniddawna a no adda dagiti ordinansa ken resolusyon a kayatda nga ipatungpal ket nawayada a mangidanun iti opisinana.
Iti pannaki-uman ti Bombo Radyo Vigan ken ni Singson, nainget ti panangibilinna a pagtalinaeden ti kapia ken urnos iti probinsia ken ti police visibility nga isu ti maysa kadagiti epektibo a wagas tapno bumaba ti bilang dagiti krimen wenno iligal nga aktibidad iti probinsia.
Kabayatanna, maragsakan ni Vice Governor Singson nga adda met laengen ti homegrown wenno naggapu iti probinsia a Provincial Director kalpasan ti pannakaipatugaw ni Police Colonel Marlo Castillo.
Malaksid dayta, impaganetgetna a “generally peaceful” ti nagbalin nga assessment iti probinsia isu nga imbilinna masapul a maitultuloy dagiti napintas a programa iti kapulisan.