VIGAN CITY – Manamnama a tatta nga aldaw a malpas iti panaglikmot dagiti miyembro ti validation team ti Department of Interior and Local Government tapnu kitaen da nu simmurot ken nakumpleto met laeng dagiti local government unit iti responsibilidad da iti road clearing operations ta nagpatinggan idi September 29 iti innem a pulo nga aldaw a naited kadakuada tapnu waknitan da dagiti kalsada a masakupan da.
Ti pannaki-uman ti Bombo Radyo Vigan, nadakamat ni DILG Undersecretary for Barangay Affairs Martin Diño nga insigida a mangiparuwat da ti show cause order kadagiti barangay chairman, city ken municipal mayors a saan a nakaipatungpal ti road clearing operations iti lugar da.
Ingunam-gunam na a dagiti kapitan a saan a simmurot iti bilin ket masuspenso wennu maikkat iti puwesto babaen ti DILG wennu ti mayor a makasakup kadakuada idinto a dagiti alkalde a sukir ken saan a simmurot iti bilin ket masuspenso wennu maikkat iti puwesto babaen ken ni Presidente Rodrigo Duterte maibasar iti rekomendasyon ni DILG secretary Eduardo Año.
Malaksid kadagiti kameng ti DILG, dagiti miyembro ti validation team ket dagiti attached agency ti DILG kas ti Bureau of Jail Management and Penology, National Police Commission, Philippine National Police, Bureau of Fire Protection ken representative nga aggapu ti civil society organization ken business sector.
