VIGAN CITY – Umaboten iti 97.12 percent ti vaccination rate iti ili ti Tagudin ket bassit laengen ti masapulda a bakunaan tapno magun-od ti target population a 28,713.
Segun ken ni Dr. Richel Dorao iti Tagudin Rural Health Unit, 18,884 dagitin fully vaccinated idinto a dagiti nakaawaten iti 1st dose da ket 28,877.
Sakbay ti national vaccination program ket sisusuporta ti Tagudin Local Government Unit iti massive campaign nga inaramidda idinto a kaaduan kadagiti residente ket sigagar met a mabakunaan.
Binalay-balayda pay dagiti barangay a nababa ti vaccination rate-na ket babaen ti panangipalawagda kadagiti residente ket naguyuguyda met laeng dagiti residente isu a nangaton ti bilang dagiti nabakunaan iti nasao nga ili.
Kabayatanna, manamanama met nga inton sumaruno a lawas ket makaalada metten iti booster shot kalpasan ti pannakaiwayat ti three-day National Vaccination Program a naawagan iti “Bayanihan, Bakunahan”.
