Pabor ti Violence Against Crime and Corruption (VACC) iti singasing ti maysa a kongresista a death penalty babaen iti firing squad kadagiti nakonbiktaran a korap nga opisial ti gobierno.
Daytoy ket singasing ni Zamboanga Rep Khymer Olaso iti salinong ti House Bill 11211 wenno ti Death Penalty for Corruption Act.
Iti pannaki-uman ti Bombo Radyo Vigan ken ni VACC President Arsenio ‘Boy’ Evangelista, patienna a babaen iti nasao nga addang ket maliklikan dagiti heinous crime ken mapabutngan dagiti opisial nga agbalin a korap.
Nupay kasta, kinunana a dumalan iti narigat a proseso ti gakat agsipud kadagiti adu nga oposisyon ngem iti biang ti VACC ket mangaramidda iti position paper a maipasa iti kongreso ken senado.
Innayonna a ti daytoy a nadara nga addang ket ipasimudaagna ti natibker a mensahe iti panagbuteng dagiti adda iligal nga aramidna nga opisial.
Malaksid dayta, patien ni Evangelista a panawenen ti panagkaykaysa tapno malabanan ti korapsyon ken ipampanawaganna dagiti opisial ti gobierno a sardengandan ti kastoy nga aramid para kadagiti umili.
