Nagpanawagan ti Volunteers Against Crime and Corruption ken ni Presidente Ferdinand Marcos Jr a mangipakita iti accountability ken kongkreto nga addang kadagiti kangrunaan nga isyu a sangsangwen ti pagilian kagiddan ti maika-lima nga State of the Nation Address-na inton bigat.
Iti pannaki-uman ti Bombo Radyo Vigan ken ni VACC President Arsenio Evangelista, karaman kadagiti kayatda a mangngegan iti SONA ti accountability kadagiti flood control project, nangruna ta adu dagiti nalaylayus a lugar iti pagilian.
Impaganetget pay ti grupo ti kinapateg ti panangilawlawag kadagiti kaso kadagiti mapukpukaw a mannadi ken panangpatibker iti linak ken talna.
Nagpanawagan pay ti VACC a papigsaenda ti accountability ti Ombudsman ken dagiti mangidaulo iti nadumaduma nga ahensia ti gobierno tapno masigurado ti naannayas a serbisio publiko.
Karaman met kadagiti kayat a maipangruna ti grupo iti SONA ti food security, gakat a mangibaba iti criminal liability, ken panangipatungpal iti addang tapno mailaklaka ti presio ti produkto-petrolyo.
