Insingasing ti Volunteers Against Crime and Corruption a maisardeng pay laeng ti panangilatang ti gobierno iti pondo para kadagiti flood control project iti pagilian.
Dayta ket iti baet ti agsasaruno a pannakaduktal kadagiti ghost flood control project.
Iti pannaki-uman ti Bombo Radyo Vigan ken ni President Arsenio ‘Boy’ Evangelista, nasken a makita pay nga umuna ti blueprint wenno detailed guidelines dagiti flood control project ken dadduma pay nga istraktura sakbay a mailatangan iti pondo tapno maliklikan a maibulsa dagiti kontraktor ti pondo.
Innayon ni Evangelista nga imbes koma a nakorap ti dakkel a gatad a nailatang kadagiti ghost flood control project ket nasaysayaat koma no nailatang iti education sector, healthcare, ken kadagiti mannalon.
Impanawagan pay ti VACC ti panagikkat iti puesto ni Department of Public Works and Highways Secretary Manuel Bonoan ta mamatida nga adda latta pakababalawanna kas mangidaulo iti ahensia a sumangsango ita iti kontrobersya.
Namnamaen ti grupo nga adda madusa kadagitoy a naibutaktak nga anomalya mainaig iti sektor ti imprastraktura.
