Inyadun ti gobierno ti vacation service credits dagiti mangisursuro ta manipud iti sangapulo ket lima nga aldaw ket napagbalinen a tallopulo nga aldaw.
Dayta ket kas sungbat iti kiddawda ken masigurado ti husto a kompensasyon para iti kanayunan a trabaho.
Segun iti DepEd, ti vacation service credits ket dagiti naala a leave credit dagiti mangisursuro kadagiti pampubliko a pagadalan para kadagiti serbisyo a maipapaay iti panawen ti kalgaw wenno atiddug a bakasyon, bakasyon iti Paskua, katapusan ti lawas, ken holiday kasta payen iti nalaus a panagisuro.
Maar-aramat daytoy a kredito tapno i-offset ti panaglangan gapu iti rikriknaen wenno tapno mabawi ti proporsyonal a kissay iti sueldo iti bakasyon gapu iti panaglangan para iti personal a rason wenno dagiti late appointment.
