VIGAN CITY – Maysa ti nakemmeg idinto a nakalibas ti lima a kakaduana kalpasan iti panangkabilda ti maysa nga utility worker idiay Brgy. Paratong, Narvacan.
Nabigbig ti suspek a nakemmeg a ni Jonathan Leones, agtawen ti duapulo ket innem, naasawaan, mannalon nga agnaed idiay Brgy. Paratong, Narvacan ken ti nakalibas a kakaduana a da Jack Cris Domingo ken Alvin Comiso agpada nga agnaed idiay Brgy. San Jose, Narvacan, Jefferson Asuncion, Gilmor Ramos ken Joel Leones nga agpapada nga agnaed idiay Brgy. Paratong, Narvacan.
Maibasar ti pakaammo ti Narvacan Municipal Police Station, nakaawatda iti impormasyon nga adda napasamak a panagkabil iti nasao a lugar isu a tinurongda ngem naipanen ti biktima a ni Edison Martinez, agtawen ti duapulo ket dua iti Ilocos Sur Narvacan District Hospital para iti pannakatamingda idinto a naglibas dagiti suspek ta naamwanda a nagresponde dagiti dagiti pulis.
Naisayangkat iti hot pursuit operation a nakakemmegan ni Jonathan Leones a naipanen iti kustodiya dagiti pannakabagi ti linteg tapno dumalan ti husto a proseso.
