VIGAN CITY – Parikut iti kuarta ken pamilia ti mapapati a rason no apay a nagbekkel babaen ti kawar ni Joy Hanna Mae Orpilla, agtawen iti duapulo ket tallo, adda live-in partner na a taga-Brgy. Suso, Sta. Maria.
Iti pannaki-uman ti Bombo Radyo Vigan ken ni PLt. Florencio Pablico, Officer-in-charge ti Sta. Maria Police Station, nadakamat ti biktima iti kabsatna a kayatnan ti agpakamatay ta maburburiburan gapu ti saannan a mabayadan nga utang ken mano a bulan payen a saan a nagpaw-it iti sustento ti live-in partner-na.
Tallo nga aldaw nga awan iti pagtaenganda ti biktima a saan nga ammo ti pamiliana ti napananna ngem idi March 15 ket nagsubli met laeng.
Alas otso iti agsapa idi kalman a nasarakan ti adingenna ti biktima a nakabitin iti kayo ti mangga iti asideg ti pagtaenganda a ti kangatona ket mapapati a duapulo a kadapan.
Naipan iti ospital ti biktima ngem naideklarar a dead on arrival ken patien dagiti pannakabagi ti linteg ken pamiliana nga awan ti foul play iti napasamak.
