VIGAN CITY – Nadundunor dagiti uppat nga Indian national gapu iti pannakaaksidenteda bayat ti panagluganda iti SUV iti national highway idiay Barangay Marcos District, Santa, Ilocos Sur idi kalman (December 25, 2023).
Ti nagmaneho iti puraw a Suzuki XL7 ket ni Mahendiran Dhinakar, agtawen iti duapulo ket maysa, baro, estudyante nga agnaed idiay Barangay Pamplona Tres, Las Piñas City, Metro Manila; idinto a dagiti pasaherona ket da Sivarishi Subrahamahiyan, agtawen iti duapulo ket tallo, maysa met laeng nga estudyante nga agnaed idiay Barangay Torre Sur, Alabang, Las Piñas City, Metro Manila; Rames Sanmogan, agtawen iti uppat a pulo ket tallo, naasawaan, cook nga agnaed idiay Sun Valley, Parañaque City, Metro Manila; ken Rengarsajan Chellamuthu, agtawen iti tallopulo ket walo, naasawaan, maysa nga IT consultant nga agnaed idiay Barangay Sun Valley, Parañaque City, Metro Manila.
Iti pannaki-uman ti Bombo Radyo Vigan ken ni Police Executive Master Sergeant Ryan Jay Quiocho manipod Santa Municipal Police Station, agpabagatan a direksyon ti SUV idin kellaat a nagpaigid iti kannigid a paset ti kalsada ken naidungpar iti alad a kukua ni Brgy. Kagawad Reneboy De Peralta Jr. idiay Barangay Marcos District, Santa.
Segun ken ni Quiocho, inkalintegan ti nagmaneho a naka-inom iti arak nga adda nakitana nga aso isu a nagpaigid ngem saanna a maibaga nu ania iti kulayna, ket nu maibasar iti CCTV footage ket awan iti makita nga aso a nagballasiw.
Gapu ti sinagaba a dunor iti nadumaduma a paset ti bagi ti driver ken pasaherona ket naipanda iti Metro Vigan Cooperative Hospital para iti pannakatamingda babaen kadagiti nagresponde a kameng ti Municipal Disaster Risk Reduction and Management Office ken Philippine National Police.
VIDEO – POLICE EXECUTIVE MASTER SERGEANT RYAN JAY QUIOCHO
