VIGAN CITY – Kaso a panaglabsing ti presidential decree 1602 wennu illegal gambling iti sangwen dagiti naaktoan ti Sta. Catalina municipal police station nga agmamahjong idiay Paratong, Sta. Catalina kas pinasingkedan ti hepe a ni Police Captain Richard Cario.
Segun ken ni Cario, ti pannakakemmeg dagiti agmamahjong idiay Brgy. Paratong idi June 17 ket babaen iti panagresponde da iti report iti maysa a concerned citizen.
Dagiti nakemmeg ket isu da Marieta Renta Realin nga agtawen iti lima pulo ket walo, balo ken awanan iti pagsapulan; Ricardo Rebaula Realin nga agtawen iti lima pulo ket siyam, balo, STL collector; Jose Ragunjan Ragamat nga agtawen iti uppat a pulo ket lima, balo, mannalon kenni Loreto Rebaula nga agtawen iti lima pulo ket siyam, naasawaan, mannalon nga agpapada nga agnaed iti nasao a barangay.
Naala dagiti otoridad iti maysa a mahjong set, dice, mahjong table ken pusta dagiti uppat a dua gasut siyam a pulo ket lima a pisos.
