VIGAN CITY – Uppat a wanted person manipod iti agduduma nga ili ken siudad iti probinsia iti nakemmeg.
Immuna a nakemmeg ti Top 1 Municipal Level wanted person a ni Rosalina Valdera Baraña, agtawen iti innem a pulo ket tallo, naasawaan, housewife nga agnaed idiay Brgy. Poblacion West, San Ildefonso gapu iti panaglabsingna ti Section 10 iti RA 7610 a narekomendaran iti pyansa nga aggatad iti P80,000 babaen ti bileg iti warrant of arrest a napetsaan idi February 28 nga inruar iti RTC Branch 20, Vigan City.
Simmaruno a nakemmeg ti top 3 municipal level a ni Judy Barrientos Llanes, agtawen iti limapulo ket lima, mangngalap, naasawaan nga agnaed idiay Brgy. Villamar, Caoayan.
Naakusaran ni Llanes iti kaso a Rape babaen ti sexual assault inaig iti RA 7610 a nairekomendaran iti pyansana a P180,000.
Kasta pay a nakemeg ti top 2 municipal level iti ili ti Sta. Catalina idiay Brgy. Poblacion West, Sta. Cruz babaen iti panagtitinnulong dagiti pannakabagi ti linteg ta panaglabsing iti Sec 5 iti RA 9262 iti sangwen a kaso iti akusado a ni Justine Javier, agtawen iti duapulo ket uppat, baro, negosyante nga agnaed idiay Brgy. Mambog, Sta. Cruz ket narekomendaran iti pyansana nga aggatad iti P72,000.
Kabayatanna, kaso a Slight Physical Injuries and Maltreatment iti sangwen ni Chester Balbin Galinato, agtawen iti tallopulo ket tallo, naasawaan, tricycle driver nga agnaed idiay Brgy. Bagani Ubbog, Candon City a nakemmeg idiay Brgy. San Jose, Candon City a nairekomendar ti P10,000 a gatad para iti temporaryo a pannakawaya-wayana.
