VIGAN CITY – Uppat a wanted person ti nakemmeg babaen iti bileg ti warrant of arrest kadagiti dua nga ili ken maysa a siudad iti probinsia.
Immuna a nakemmeg idiay Barangay Pudoc East, Tagudin ni Russel Barnachea, agtawen iti duapulo ket maysa, mannalon, agnaed iti nasao a lugar.
Sumangsango ni Barnachea iti kaso nga Acts of Lasciviousness iti salinong ti Article 336 ti RPC in relation to sec 5 paragraph B ti RA 7610 a ti warrant of arrest-na ket inruar ti Acting Presiding Judge ti RTC, First Judicial Region, Branch 25, Tagudin a napetsaan iti October 27, 2022.
Nailatang ti uppat a ribo a pisos a pyansa para ti temporaryo a pannaka-wayawayana.
Idiay met Barangay Pula, Tagudin a nakemmeg ni Eligio Oligario, agtawen iti tallopulo ket pito, negosyante, agnaed iti nasao a barangay.
Sumangsango ni Oligario iti kaso a panaglabsing iti section 5 paragraph I ti RA 9262 a ti warrant of arrest-na ket inruar ti Acting Presiding Judge ti RTC, First Judicial Region, Branch 25, Tagudin a napetsaan iti October 27, 2022.
Nailatang ti tallopulo a ribo a pisos a pyansa para ti temporaryo a pannaka-wayawayana.
Idiay Barangay VIII, Vigan City ket nakemmeg met ni Edwin Tobias, agtawen iti tallopulo, delivery boy, taga-Barangay VI, Vigan City.
Ni Tobias ket sumangsango iti kaso nga estafa a ti warrant of arrest-na a napetsaan iti September 20, 2022 ket inruar ti Acting Presiding Judge ti First Judicial Region, MTC, Bantay.
Innem a ribo a pisos ti nailatang a pyansa para ti temporaryo a pannaka-wayawayana.
Kabayatanna, idiay Barangay Lorenzo, Caoayan ket nakemmeg ni Emely Yacas Perez, agtawen iti duapulo ket walo, negosyante, tubo iti Barangay Cabulalaan, Sinait ngem agdama nga agnaed idiay Barangay Don Alejandro, Caoayan.
Sumangsango ni Perez iti kaso nga Attempted Murder, a ti warrant of arrest-na ket inruar ti Judge iti First Judicial Region RTC Branch 20, Vigan City, napetsaan iti July 17, 2013.
Sangagasut duapulo a ribo a pisos ti nailatang a pyansa para ti temporaryo a pannaka-wayawayana.
