VIGAN CITY – Uppat a wanted person ti nakemmeg manipud kadagiti uppat nga ili iti probinsia babaen iti bileg ti warrant of arrest.
Idiay Barangay Paras, Sto. Domingo a nakemmeg ni Mark Clarence Padua, agtawen iti sangapulo ket siam, Highschool student nga agnaed iti nasao a lugar.
Kaso a Less Serious Physical Injury ti sangsangwen ti suspek a nairekomendaran iti lima a ribo a pisos para ti temporaryo a pannaka-wayawayana.
Ni Jerry Del Rosario alyas Jing, agtawen iti uppat a pulo ket tallo, Barangay Kagawad ti Angkileng, Sta. Lucia ket nakemmeg gapu ti sangsangwenna a dua a bilang ti Lascivious Conduct, Section 5 iti Republic Act 7610.
Napetsaan iti May 13, 2022 ti warrant of arrest-na nga imparuar ti Family Court Branch 8, Candon City ken nairekomendaran iti PHP180K a pyansa iti kada bilang ti kasona.
Panaglabsing iti Sec 5 ti RA 7610 met laeng ti nakakemmegan ni Noel Gamisera, agtawen iti duapulo ket tallo, furniture worker a taga-Barangay Rubio, Galimuyod.
Nairuar ti warrant of arrest-na babaen iti Branch 8, Candon City a napetsaan iti May 13 ken nairekomendaran iti PHP180K.
Kabayatanna, Top 2 Most Wanted Person iti Municipal Level ni Oliver Oliver, agtawen iti uppat a pulo ket maysa, contractor a taga-Namalpalan, Magsingal.
Nairuar ti warrant of arrest na babaen ken ni Hon. Judge Homer Jay Ragunjan, Presiding Judge iti RTC 1st Judicial Region Branch 24, Cabugao gapu iti panaglabsingna kadagiti rules and regulations a pakairamanan iti pannakaiparit ti panagikot iti paltog ken sabali pay a deadly weapons; employment availment wenno engagement kadagiti security personnel wenno bodyguard bayat ti election period idi May 13, 2019 National and Local Elections nga adda pakainaiganna iti RA 10591.
Innem a pulo a ribo a pisos ti nairekomendar a pyansa ti suspek para ti temporaryo a pannaka-wayawayana.
