VIGAN CITY – Uppat iti nakemmeg pakairamanan ti dua a menor de edad iti agduma nga operasyon iti dua nga ili iti probinsia.
Immuna a nakemmeg ti Top 1 Municipal Level a ni Jun Lun Jacosalem, agtawen iti tallopulo ket siam a taga-Brgy. Sabuanan, Sta. Lucia gapu iti panaglabsingna iti Section 5 iti Article II iti RA 9165 nga awan iti nairekomendar a pyansana.
Iti agdama ket addan ni Jacosalem iti kustodiya iti Sta. Lucia Municipal Police Station para iti booking ken documentation sakbay iti pannakaipresentarna iti korte.
Simmaruno a nakemmeg da Victor Valdez Lagrana, agtawen iti duapulo ket maysa, baro, estudyante; ken dua a menor de edad nga agtawen iti sangapulo ket innem ken sangapulo ket pito nga agpapada nga agnaed idiay Quirino, Tagudin.
Dagiti akusado ket nakemmeg babaen ti warrant of arrest nga inruar ti RTC Branch 25, Tagudin a napetsaan idi August 1, 2021 gapu iti kasoda a Less Serious Physical Injuries nga adda sag-innem a ribo a pisos a pyansada.
Addan iti kustodiya iti Tagudin Police Station dagiti akusado para iti documentation kasaruno iti pannakaipresentarda iti korte.
