VIGAN CITY – Uppat iti nadangran kalpasan a kinabil dagiti dua a lallaki idiay Brgy. Poblacion, San Vicente.
Iti pannaki-uman ti Bombo Radyo Vigan ken ni PMaj. Henry Garcia iti San Vicente Police Station, nagturong dagiti dua a suspek iti pagborbordingan ti nobya ti maysa kadakuada ta naamwanna nga adda iti uppat a maki-sleep over iti yanna pakairamananen ti dati a kaayan-ayat ti nobyana isu a narurod.
Segun ken ni Garcia, uray nakataray dagiti biktima idi kinamat isuda dagiti suspek ket sinurotda latta agingga nakamatanda ket kinabilda babaen iti panangbatoda ken panagaramatda iti bote.
Gapu ti pasamak ket nagpaarayat dagiti biktima iti pagtaengan ni Emannuel Peralta Jr. nga agnaed ti nasao a lugar.
Naamuan a naaddaan ti traffic violation dagiti uppat a biktima iti siudad ti Vigan ket na-impound dagiti luganda isu a maki-sleep over da koma iti ayan ti nobya ti maysa a suspek.
Iti agdama, ipila latta dagiti biktima ti kaso kadagiti dua a suspek tapno adda iti pagnakmanda uray kiniddaw dagiti suspek a saan koman a dumanon iti korte.
Kabayatanna, nagpalagip ni Garcia kadagiti agindeg iti San Vicente a sumurot latta iti linteg a maipapatungpal kangrunaan iti curfew ken pinalagipanna dagiti nagannak a bantayan a nasayaat dagiti annak tapno saanen a mapasamak iti kas ti nasao nga insidente.
