VIGAN CITY – Maisagsaganan ti kaso a swindling a sangwen ni Police Staff Sergeant Habatha Tahani Aytalin Al Shani, PNP member iti Vigan City Police Station a taga-Barangay San Julian Norte, Vigan City gapu ti panang-scam na kada Marjorie Rapacon, agtawen iti tallopulo ket uppat; Richelle Padua, Rosalinda Rosete, agpada a taga-Barangay Cabuloan, Sta. Catalina ken ni; Fe Pastor a taga-San Isidro, Bantay.
November 2021 idi nag-chat ti suspek iti biktima a ni Marjorie iti Facebook messenger ket sinaludsodna no kayatna ti sumali iti DOUBLE KITA.
Sinaludsod ti biktima no lehitimo ti ididiaya ti suspek ket simmungbat met ti suspek a saan nga scam ta saanna met kayat a rugitan ti unipormena agsipud ta isu ket maysa a pulis.
Gapu dayta, naallukoy a simmali ti biktima ken rinugianna idi December 2021 ti nagbayad iti gatad a tallo ribo a pisos.
Iti maikadua a lawas ti Disyembre, chinat ti suspek ti biktima no i-roll na ti kuartana nga innem a ribo a pisos ket sinungbatan met ti biktima a bayadanna ti gudwana.
Kalpasan ti lima nga aldaw, personal nga indeliver ti suspek ti pay-out iti pagtaengan ti biktima a ni Marjorie.
Iti dayta a kanito, namati ni Marjorie a ti “DOUBLE KITA” ket saan a scam ket sipud dayta, nangallukoy met iti sabali a sumali ket amin dagiti pay-in-da ket naipaima ken ni Marjorie nga isunto met ti itedna iti suspek ngem gapu ta saan a nakaumay ti suspek ket nangipatulod iti maysa a katalekna a ni “ABEL”.
Numan pay naikkan iti gundaway ken tiempo ti suspek nga i-settle ti nasao a banag, agingga iti agdama ket saanna pay nga insubli ti kuarta dagiti biktima a PHP423,800.
