VIGAN CITY – Nagpalagip ti hepe ti Narvacan Municipal Police Station iti publiko inaig iti nainget a panangsurot iti health protocols kangrunaan ti panagserrek iti ili a masakupanna iti baet ti covid-19 pandemic.
Ti nasao a palagip ket kalpasan iti panaglabsing iti uppat a tattao a simrek iti probinsia ta saanda a simmurot iti husto a proseso ken saan a kompleto ti dokumentoda.
Iti pannaki-uman ti Bombo Radyo Vigan ken ni PCapt. Arcadio Viloria, dagiti suspek ket agnaed iti Brgy. Sulvec ken Brgy. Margaay iti nasao nga ili.
Segun ken ni Viloria, adda iti impakita a resulta ti RT-PCR test ni Tony Naungayan Cabasa, agtawen ti uppat a pulo ket siam, taga-Margaay, Narvacan a driver ti Rescue Vehicle nga adda ti markana a Master SG a nakarehistro ti Caloocan City ngem saanna nga indeklarar nga adda iti kakaduana nga isu da Ermelinda Funtanilla Sunico, agtawen ti pito pulo ket pito, Rye Derek Ocampo Sunico, ken Zarina Rey Tapiceria Vicente, agtawen ti sangapulo ket walo nga agpapada nga agnaed idiay Brgy. Sulvec, Narvacan.
Dagiti nasao a suspek a naggapo idiay Manila ket nagawid iti barangayda tapno makiminatay ngem adda dagiti nakatakuat a saanda a dimmalan ti RT-PCR test ken quarantine isu nga impakammoda iti pannakabagi ti linteg.
Nupay kasta ket naka-quarantinen dagiti uppat a suspek kagiddan iti pannakaipila kadakuada iti kaso a panaglabsing iti Article 151 iti Revised Penal Code ken Provincial Executive Order No. 95.
