VIGAN CITY – Uppat ti nakemmeg a nagsusugal idinto a ti maysa ti nakalibas iti naiwayat nga Anti-Illegal Gambling operation idiay Barangay Nalasin, Sto. Domingo.
Nabigbig dagiti nakemmeg a suspek a ni Freddie Sol Saveliano, agtawen iti uppat a pulo ket uppat, construction worker nga agnaed iti Barangay Cuancabal, Cabugao; Kennedy Velasquez Cabuhug, agtawen iti duapulo ket pito, construction worker nga agnaed iti Barangay Lubong, San Vicente; Jose Jonas Albalos Nolasco, agtawen iti limapulo ket innem, agnaed iti Barangay Don Lorenzo, Caoayan; ken ni Edmar Torricer Dela Rosa, agtawen iti uppat a pulo ket dua, agnaed iti Barangay Nalasin, Sto. Domingo idinto a ti nakalibas ket ni Allan Tobias.
Naaktuan dagiti suspek nga agaayam iti Lucky 9 iti natayan ket naala kadakuada iti maysa a set ti baraha ken pusta nga PHP11,716.
Nupay kasta, sangwen dagiti suspek ti kaso a panaglabsing iti Presidential Decree 1602 wenno ti Anti-Illegal Gambling Act.
