VIGAN CITY – Uppat iti nakemmeg gapu iti panaglabsingda iti Presidential Decree 1602 idiay Brgy. San Roque, Santiago.
Nabigbig dagiti suspek a sa Rodolfo Bragado Lapena, agtawen iti innem a pulo ket siam, naasawaan nga agnaed iti nasao a lugar; Felix Caneta Morales, naasawan, agtawen iti innem a pulo ket siam, dati a seaman nga agnaed idiay Brgy. Olo Olo Sur; Maribel Mamaclay Bunag, agtawen iti tallopulo ket siam, naasawaan, awanan ti trabaho nga agnaed idiay Brgy. San Roque; ken Rayci Escalona Etrata, agtawen iti tallopulo ket innem, fish vendor nga agnaed idiay Brgy. Gabao iti ili ti Santiago.
Insayangkat dagiti kameng ti Santiago Municipal Police Station ti anti-illegal gambling operation iti nasao a lugar a nagresultaan ti pannakakemmeg dagiti suspek a naaktuan iti panagay-ayamda ti pusoy-dos.
Naala kadakuada iti maysa a set iti baraha, maysa a monoblock a lamisaan ken pusta nga aggatad iti P2,771.
Naipan iti Candon General Hospital dagiti nakemmeg a suspek para iti medico legal ngem naipansa met laeng nga insigida iti Santiago PNP pakairamananen dagiti naala kadakuada.
