VIGAN CITY – Uppat a nagsusugal ti nakemmeg idiay Brgy Sulvec, Narvacan nga agpapada a sumango iti kaso a panaglabsing iti Presidential Decree 1602 wenno Illegal Gambling Act.
Nabigbig dagiti suspek a da Dindo Norverte, agtawen iti uppat a pulo; Edgardo Castro, agtawen iti limapulo ket pito; Genevive Reyes, agtawen iti duapulo ket walo ken ni Rolando Catholico, agtawen iti uppat a pulo ket innem nga agpapada a taga-Sulvec.
Iti pannaki-uman ti Bombo Radyo Vigan ken ni PMaj. Daniel Burgos, hepe ti Narvacan Police Station, agpatpatrolyada idi adda maysa a concerned citizen ti nangipakaammo kadakuada nga adda nagsusugal isu a napanda iti lugar ket naaktuan dagiti suspek nga aga-ayam iti pining-pining ken pusoy ngem nupay kasta, saanda a pinaglibakan ti iligal nga aramidda.
Uppat a monobloc chair, pusta a PHP1,225, lamisaan, ken baraha ti naala nga ebidensya manipud kadagiti suspek.
Impasigurado met ni Burgos nga agtultuloy ti panagbantayda ken panangtiliw kadagiti aglabsing iti protocol bayat a naisakup iti Modified Enhanced Community Quarantine ti ili a Narvacan.
