VIGAN CITY – Kaso a panaglabsing iti Republic Act 11332 (Non Cooperation) ken Article 151 (Disobedience) iti Revised Penal Code ti sangwen dagiti uppat a naglabsing iti quarantine protocols idiay Tagudin border control point.
Dagiti natiliw ket da Lester Tabin, agtawen iti duapulo ket siam, drayber; Elyzel Bumindang Pugyon, agtawen iti tallopulo ket siam, doktor nga agpada a taga-Bengao Bakakeng Central, Baguio City; Vena Liza Belino, agtawen iti tallopulo ken ni Ailyn Belino, agtawen iti duapulo ket siam nga agpada a taga-Aurora Hill, Baguio City.
Iti pannaki-uman ti Bombo Radyo Vigan ken ni Police Captain Jose Bandong II ti Tagudin Police Station, nangtedda ti checkpoint sticker kadagiti uppat a natiliw a naggapu idiay Baguio agsipud ta imbagada a lumabasda laeng iti probinsia ta idiay Ilocos Norte ti papananda.
Idi ininspeksion dagiti nakabantay iti checkpoint idiay Sinait border ti van ket naduktalan nga agkurang dagiti pasahero a nakalugan isu a nakikammayetda nga insigida kadagiti pannakabagi ti linteg ket naduktalan a dimsaag dagiti dua idiay Sto. Domingo.
Nagpalagip ni Bandong kadagiti sumrek iti probinsia a masapul a makompleto dagiti papelesda kas ti health certificate, travel authority ken negative result ti Covid19 testing idinto a no lumabas laeng iti probinsia ket masapul a siguradwenda a saanda a dumsaag.
