VIGAN CITY – Uppat ti nakemmeg a nagsusugal idiay Barangay Lungog, Narvacan babaen ti naiwayat nga Anti-Illegal Gambling operation.
Nabigbig dagiti suspek a da Virginia Dela Cruz Amicay, agtawen iti limapulo ket tallo; Rommel Antolin Cabanit, agtawen iti limapulo ket tallo; Jonathan Cabanit Camarillo, agtawen iti tallopulo ket innem; ken ni Jacinto Valderama Gaboy Jr., agtawen iti uppat a pulo ket lima, agpapada a taga-Barangay Lungog, iti nasao nga ili.
Naaktuan dagiti suspek nga agaayam iti mahjong ket naala kadakuada ti maysa a set ti mahjong, uppat a tugaw, dua a lamisaan ken PHP700 a pusta.
Iti pannaki-uman ti Bombo Radyo Vigan ken ni PMaj. Alexander Dangli, damo dagiti suspek ti matiliw ken iti uneg ti maysa nga abandonado a pagtaengan iti highway ti ayanda a nagsusugal.
Nupay kasta, sangwen dagiti suspek ti kaso a panaglabsing iti Presidential Decree 1602 wenno Anti-Illegal Gambling Act.
Kabayatanna, kinuna pay ni Dangli a binulan ti panangisaysayangkatda iti operasyon ket damo ita a bulan ti Hulyo dagiti natiliwan.
