Uppat iti nakemmeg pakairamanan dagiti dua a babbai gapu iti panaglabsingda iti Omnibus Election Code ken Republic Act 10591 iti Villa Gloria Resort, Barangay Bulanos, Narvacan, Ilocos Sur idi rabii, May 12, 2025.
Dagiti suspek ket babai nga agtawen iti innem a pulo ket tallo; babai nga agtawen iti duapulo ket pito; lalaki nga agtawen iti tallopulo ket lima nga agpapada a taga-Poblacion, San Quintin, Abra ken maysa a lalaki nga agtawen iti limapulo ket pito a residente idiay Barangay Pantoc, San Quintin, Abra.
Nagresponde dagiti otoridad iti naipakaammo kadakuada a mapapati a vote buying ket iti panagsangpet dagiti PNP, nakitada iti lugan a mapapati a naaramat para ti vote buying a nabigbig nga orange Ford Ranger ken White Altera.
Naala iti agtawen tallopulo ket lima a lalaki iti maysa a Taurus cal. 45 nga adda magazine na ken nakaipan nga innem a piraso iti live ammunition para iti cal. 45.
Ti met naala manipod iti agtawen iti limapulo ket pito a lalaki ket siam a piraso iti live ammunitions para iti cal. 22, P31,400 a kuarta, sample ballot, piraso iti papel nga adda naganna, gatad ken pirma, karamanen ti National ID.
Naala met kadagiti babbai iti tallo a bundle iti P1,000 peso bill nga aggatad ti P29,000, maysa a bundle iti P500 nga aggatad ti P20,000 ken P2,182 a personal cash, National ID, piraso iti papel nga adda nagnagan ken contact number dagiti botante, ken maysa nga adidas a black bag pack ken sample ballots.
Iti agdama, dagiti suspek ket nakakustodiyan iti Narvacan Municipal Police Station.
