VIGAN CITY – Dead on the spot ti uppat a lalaki ken uppat ti nadunor iti napasamak a pammaltog idiay Barangay Labut, Magsingal.
Dagiti natay a mapapati a kadua ti kampo ni Mayorial candidate Lorry Salvador ket da Lerry Pol Harmon Torda a taga-Maratudo, Magsingal; Recto Bagani Bacdayan a taga-Ayeng, Manabo, Abra; Jovito Ramos Tumaneng a taga-Barangay Bagut, Dingras, Ilocos Norte, retirado a Philippine Army; ken ni William Sican Bulil-lit, taga-Barangay Barbaquezo, Carasi, Ilocos Norte, dati a CAFGU member ken dati a kapitan.
Dagiti met nadunor manipud iti kampo ti kandidato para bise mayor Larry Ceria ken Mayorial candidate Alrico Favis ket da Albert Ascueta Bañez a taga-San Ramon, Magsingal; Romnick Villanueva idinto a dagiti nadunor manipud met iti kampo ni Salvador ket da Teofilo Urro Taasin, drayber ti vice mayorial candidate a taga-Maratudo; ken ni Kenneth Salvador Seatriz, manager ti Blue J’s Gasoline Station a taga-Baclig, Cabugao.
Kabayatanna, nakemmeg met dagiti mapapati a supporter ni Mayorial Candidate Favis a da Minelio Tolentino Oliver a taga-Patong, Magsingal, naalaan iti caliber 45 armscor nga adda pito a balana ken ni Eddie Unciano Unso a taga-Patong.
Naala iti nakapasamakan ti krimen ti dua a caliber 45.
Iti pakpakauna nga imbestigasyon, mapapati nga adda mapaspasamak a vote buying iti nasao a barangay isu a nagtutrong ti grupo da Magsingal Mayoralty Candidate Salvador Jr. ken Vice Mayoralty Candidate Ceria agingga nga adda napasamak a pammaltog.
Nupay kasta, kayat a paimbestigaran ni Governor Ryan Singson ti napasamak.
Iti pannaki-uman ti Bombo Radyo Vigan ken ni Governor Singson, nabara ti laban iti nasao nga ili ta idi pay laeng ket addan dagiti kinaranggas a mapaspasamak.
Binilin ti gobernador ni Ilocos Sur Police Provincial Director P/Col. Wilson Doromal a mangnayun iti pwersa dagiti pannakabagi ti linteg ken dagiti army a mangbantay kadagiti residente iti ili ti Magsingal.
