VIGAN CITY – Uppat a divers a naggapu iti Baseco Port Area Manila ti naalaw ti Philippine Coast Guard iti kabaybayan a sakupen ti Sitio Punta, Barangay Cabittaogan, Sta. Catalina gapu ti pannakalmed ti bangkada.
Nabigbig dagiti diver a da Ernesto Balono Jr.,agtawen iti duapulo ket walo; Jaime Cervantes, agtawen iti uppat a pulo ket pito; Joel Tomaquin, agtawen iti limapulo ket tallo ken ni Ricky Eludo, agtawen iti limapulo ket maysa, agpapada nga empleado ti FES Challenger Salvour and Builder.
Segun ken ni Balono Jr., maysa kadagiti diver, agturongda koma idiay Cagayan Valley idi pay laeng December 2 para iti misyonda idin ta saan a kinabaelan ti bangkada ti dakkel a dalluyon isu a limned, simrek ti nadum ket nadadael, tallopulo a metro ti kaadayona manipud iti igid ti baybay.
Nupay kasta, nakalangoy dagiti biktima babaen ti inaramatda ti galloon ti mineral water a kimmaptan a nagpaigid nga isu met ti gundaway a pannakakita kadakuada ti limmabas a PCG.
Kabayatanna, pinasingkedan met ni Cervantes nga idi nayanud ti bangkada ket dagus nga innalana dagiti tumtumpaw nga alikamenda  agingga a naibangkag isuna dagiti tattao iti aglawlaw.
Nupay kasta, natalgeden ti kasasaad dagiti uppat a diver idinto a ti maysa kadakuada ket nadunor ti sakana.
