Agtultuloy ti imbestigasyon ti Vigan City Police no ania ti motibo iti pammaltog a napasamak idiay Barangay Pantay Daya, Vigan City, Ilocos Sur.
Ti biktima ket ni Senior Fire Officer I Anthony Tarinay Manuel, agtawen iti uppat a pulo, naidestino iti Bureau of Fire Protection-Vigan idinto a saan pay nabigbig ti suspek.
Iti pannaki-uman ti Bombo Radyo Vigan ken ni PLTCOL. Reynaldo Mendoza Jr., rimuar manipud iti balayda ti biktima ket idi lumugan iti motorsiklona, isu met ti panangpaltog dagiti suspek kenkuana.
Natirwan ti akin-kannigid a paset ti bagi ti biktima a puon ti nakatayanna.
Naala met iti nakapasamakan ti insidente ti 4 cartdrigdes ken maysa a fired bullet.
Pinasingkedan met ti karrubada a ni Remijio Embida nga awan ti pagarupenda a rason no apay a napaltugan ti biktima ta nasingpet met ti panagkunada ken saan unay a rumrumuar iti balayda.
