Nakakustodiyan iti San Vicente Municipal Police Station ti suspek a nangpapatay iti maysa a babai idiay Barangay Lubong, San Vicente idi rabii ti May 18, 2025 kalpasan a simmuko kadagiti otoridad.
Ti suspek ket agtrabtrabaho laeng iti asideg ti pagtaengan ti biktima a ni Gloria Rebuldela Ribultan, agtawen iti tallopulo ket pito, agnaed iti nasao a lugar.
Iti pannaki-uman ti Bombo Radyo Vigan ken ni PCapt. Pedro Halover iti San Vicente MPS, apaman a simmuko ti suspek ket inaminna nga agbabawi ta saanna nga ammo iti inub-ubrana wenno nablangko idi inaramidna iti krimen.
Segun ken ni Halover, idi saludsudenda nu ayanna iti inaramatna a pinangbagkong ti biktima ket awan ti maisungbatna ta saanna a malagip dagiti inububrana.
Naammoan nga awan ti madi a rekord iti nasao a barangay ti suspek isu a dakkel a saludsud iti panangaramidna iti krimen isu a saan nga ikkaten dagiti otoridad iti anggulo a posible a kursonadana ti biktima.
Iti CCTV footage iti pagtrabtrabahoan ti suspek ket nakita a limmabas isuna, mano laeng a minutos sakbay iti oras ti pannakapasamak iti krimen ket kalpasanna limmabas manen a nagsubli.
Inlawlawag ni Halover a kadagiti nasao nga oras ket isu ti panagpakada a pumanaw ti suspek kadagiti kakaduana nga aggiinom iti nasao a lugar ngem saanen a nagsubli pay iti ayanda.
Nupay kasta ket saan nga inamin ti suspek nu rinamesna ti biktima sakbay iti panangpapatayna babaen ti panangbagkongna ti tengngedna.
Maipalagip a nasarakan laengen ti biktima nga awan ti sapin ken underwear-na ken dara-dara gapu iti nakaru a pannakabagkong ti tengngeddna a puon ti nakatayanna.
Kabayatanna, kaso a murder iti maipila kontra ti suspek ngem nu mapaneknekan a rinamesna ti biktima ket manayon ti kaso a rape a maipila kontra kenkuana.
VIDEO – PCAPT. PEDRO HALOVER
