VIGAN CITY – Patien dagiti kameng ti Candon City police station nga adda diperensiya iti panagpanpanunut ni Raymond Soriano nga agtawen ti tallo pulo ket lima gapu ti depresyon iti mapapati a kapapanunut kadagiti utang ni baket na a ni Bernadet isu a binagkong na agingga a natay ket kalpasanna, inbitin na ti bagi na babaen ti nylon cord iti kusina ti pagtaengan da idiay Brgy. Salvador 2nd, Candon City idi February 25.
Agsipud iti dayta, maibilang a nasolbaren iti nasao a banag ta segun ken ni Police Lt. Col. David Dulnuan, hepe ti Candon City PNP, awan met iti makasoan wennu maidarum ta natay met ni Raymond a nangbagkong ken ni Bernadet nga asawa na, malaksid iti dayta ket adda pay dagiti nakakita ken mangpaneknek a nagbekkel ni Raymond idi napatay na ti asawa na.
Maipalagip a segun ti kasinsin ni Raymond a ni Wilma Ganado, manipud idi nagawid ni Raymond idi November a naggapu iti barko a nagluganan na, saanen a maun-uni ken kanayon a nakaun-uneg iti panpanunuten na ngem saan na met a naibagbaga nu anya iti parikot na.
Malaksid iti depresyon ken utang, atapen pay dagiti kameng ti linteg a nakaro nga imon ti maysa kadagiti rason nu apay a napatay ni Raymond ti baket na.
