VIGAN CITY – Iururay ti Sta. Maria Municipal Police Station iti resulta iti nagbalin nga imbestigasyon ti Scene of the Crime Operatives iti pannakatay ni Ronald Flores Villaruz a nasarakan idi kalman nga awan iti biagna iti kubo na idiay Brgy. Gusing, Sta. Maria.
Iti pannaki-uman ti Bombo Radyo Vigan kenni PCapt. Joel Dasargo, agtultuloy iti imbestigasyon da ken panangkalap ti naananay nga impormasyon ken ebidensya ti kapulisan inaig iti nasao a pasamak no man pay maiururay iti resulta ti imbestigasyon ti SOCO no ania iti pudno a pasamak ti biktima.
Basar ti imbestigasyonda awan iti makitada a pagilasinan no naparigat ti biktima wenno adda iti nakaririna sakbay iti pannakatayna.
Pattien ni Dasargo nga indeppel ti biktima ti paltog iti tengedna ken narekobre ti lugar ti paltog a naaramat iti mapapati a panagpakamatayna.
Innayon ti pamilya ni Villaruz nga awan iti foul play na iti napasamak a pannakatay ni Ronald iso a nagkedkeddan a dumalan pay ti autopsy ti bangkayna.
Imbingay ni Mark Jay Daquel Villaruz, kaanak ti biktima nga idi kalman mapanna kuma bagkaten ti irik a mailako ngem nakitana laengen ti ulitegna a nakaidda nga awan iti biagna ken iggem na ti maysa nga home made pistol.
