VIGAN CITY – Saanen nga umuna a gundaway a mapasamak ti pannakapaltog ti pagtaenganda da Melvin Tacla Domingo ken ni Reynaldo Goimmayen Domingo idiay Barangay Naglaoa-an, Sto. Domingo ta idi Mayo ket nakarkaro pay ti panagpaputok iti paltog dagiti suspek.
Iti pannaki-uman ti Bombo Radyo Vigan ken ni Domingo, maipakaminduan ti pannakapaltog ti pagtaenganda ta idi alauna iti parbangon idi Mayo 16 ti umuna a gundaway.
Kinunana nga nabnabtak pay ti sarming dagiti tawa ti pagtaenganda.
Ket idi met rabii (July 6), agin-inomda iti likudan ti pagtaenganda idi dua a lalaki a nakalugan iti TMX motorcycle ti nangpaltog iti pagtaenganda iti namin-ano a daras babaen ti nausar a caliber 45 a paltog kas maibasar iti pito a buli ken dua a deformed slug a naala manipud iti nakapasamakan ti pammaltog.
Naglibas dagiti suspek kalpasan ti pasamak idinto a nangiwayat met nga insigida dagiti pannakabagi ti linteg iti hot pursuit operation ngem saanda a natiliw.
Kabayatanna, innayon ti biktima nga idi 2021 ket nakapatay ti amana babaen ti pammagkong agsipud ta sinalwadanna idi ti bagina manipud iti panangbagkongda met kenkuana.
Numan pay buteng ti adda a marikriknada iti daytoy a gundaway ket namnamaenna a babaen ti tulong dagiti pannakabagi ti linteg ket maisardeng ti kastoy a pasamak kadakuada.
