VIGAN CITY – Im-imbestigaranen dagiti kameng ti Cabugao municipal police station iti pannakalimlimo ti agama a negosyante idi rabii idi kalman babaen iti nagpammarang a ni Mayor Edgardo Cobangbang Jr.
Segun ken ni Police Master Sergeant Walter Tapangco ti Cabugao PNP, nakaawat ti tawag ni Onarce Porte, agtawen ti tallo pulo, negosyante ken agnaed idiay Brgy. Daclapan, Cabugao manipud ti maysa a saan a nakarehistro a numero iti cellphone na ket inyam-ammo ti timmawag kenkuana nga isuna ni Mayor Cobangbang nga agpagpagatang ti uppat a botelya ti arak.
Gapu ta saan a masango ni Onarce iti mapan gumatang, inbaon na ti ama na a ni Onofre nga agtawen ti innem a pulo ket uppat ta isu iti mapan gumatang kadagiti nasao nga arak.
Idi makadanun ni Onofre iti gumatangan na ti arak, adda iti timmawag kenkuana a saan a nakarehistro a numero ket nagpabigbig a ni Mayor Cobangbang nga agpapaload ken ni Onofre ti nasurok a sangagasut ket uppat a pulo ribo a pisos nga ipasa na kadagiti 29 a cellphone number.
Malaksid iti dayta, nagpareserba pay ti dua a kwarto idiay Maron’s Beach House idiay Barangay Daclapan, Cabugao ken nagpa-order ti pangngaldaw.
