VIGAN CITY – Agtultuloy ti imbestigasyon dagiti kameng ti Sinait municipal police station inaig iti naduktalanda nga agsusugal idiay Brgy. Pug-os, Sinait ta posible a kasoanda pay ti akinkukua iti pagtaengan a nangipalubos kadagiti suspek.
Nabigbig dagiti suspek a da Joel Somera, agtawen ti tallopulo ket tallo, drayber ti ambulansia, agnaed idiay Brgy. Bonifacio, Cabugao; Erickson Tinaza, agtawen ti sangapulo ket walo nga agnaed idiay Brgy. Pug-os, Sinait; Gody Laureta nga agnaed idiay Brgy. Zapat, Sinait ken maysa pay a saan a nabigbig a babai.
Ti pannaki-uman ti Bombo Radyo Vigan ken ni P/Capt. Bryan Tacazon, hepe ti Sinait PNP, nangisayangkatda ti illegal gambling operation ket naduktalan nga aga-ayam dagiti suspek ti pepito iti maysa a natayan ken nagresultaan ti pannakakemmegda idinto a ni Laureta ken ti saan pay a nabigbig a suspek ket nakalibas nga isu ti sapsapulenda iti agdama.
Naala kadakuada ti maysa a set ti baraha, ken pusta nga aggatad ti uppat a ribo limagasut innem a pulo a pisos ket maisagsagana iti kaso a maipila kontra kadakuada.
