Saanen nga agipila iti kaso ti pamilia ti menor de edad a nadungpar iti utility vehicle iti national highway idiay Barangay Bacsil, San Juan, Ilocos Sur.
Ti drayber ti white Kia Utility Vehicle ket negosiante nga agtawen iti limapulo ket uppat, taga-Barangay 7 Surgui Paoay, Ilocos Norte.
Ti met pedestrian ket agtawen iti sangapulo ket uppat, taga-Barangay Guimod Sur, San Juan.
Iti pannaki-uman ti Bombo Radyo Vigan ken ni PLT. Reynald Ramos, tumulong ti nakadungpar a drayber iti magastos iti ospital ti menor de edad nga ita ket agpapalaing pay laeng iti ospital.
Maibasar iti CCTV footage, dimsaag ti menor de edad manipud iti bus ket idi bumallasiw iti national highway, saanna a nadlaw ti sumungad a utility vehicle ket nadungpar ken naipurwak iti sumagmamano a metro ti kaadayona.
Pinadas pay nga ingawid ti kaduana ngem saanna a nakamakam isu a napasamak ti aksidente a puon ti nagsagrapan ti nasao a menor de edad iti dunor iti ulo ken pannakatukkol ti kannigid a takyagna.
