VIGAN CITY – Nadismaya ni Barangay Kagawad Cesar Garbida ti Baybayabas, Santiago gapu ta idiay lugarda ti nakaikalian dagiti sangapulo ket uppat a baboy a nakompiskar idiay Ayudante, Candon City idi naminsan nga aldaw.
Kayat ni Garbida a sakbay kuma a naikali idiay lugar da dagiti nasao a baboy a mapapati a naggapu idiay Pangasinan nga apektado ti African Swine Fever virus ket naipakammo kadakuada ta napagpapatangan da nga opisyal ti barangay tapnu saan kuma nga agdandanag tatta dagiti kalugaran da.
Maburburtiyaan da pay ta apay nga idiay lugar da iti nakaikaliyan dagiti baboy idinto a nalawlaw pay ti Candon City ngem iti ili ti Santiago.
Madanagan da gapu iti posible a dakes nga epektona iti salun-at da ken dagiti agtartaraken met laeng iti baboy iti pannakaikali dagiti baboy iti lugar da.
