Pimmusayen dagiti nagkalubbon iti motorsiklo a natukbob ti wing van truck itinational highway ti Brgy. Saoat, Sta. Cruz, Ilocos Sur, itay alas kuatro iti parbangon.
Ti motorsiklo ket minaneho ti lalaki nga agtawen iti duapulo ket innem, kinalubbonna ti lalaki nga agtawen iti tallopulo ket walom agpada a taga-Barangay Pinipin.
Ti met wing van truck ket minaneho ti lalaki nga agtawen iti duapulo ket tallo, taga-Barangay Bagani Campo, Candon City.
Iti pannaki-uman ti Bombo Radyo Vigan ken ni Police Executive Master Sergeant Israel Albay, agpapa-abagatan dagiti dua a lugan idin ta saan a nadlaw ti trak ti motorsiklo ta awan ti tail light-na.
Pinadas a lisyan ti drayber ti truck ti motorsiklo ngem no ngamin ta kabigenna iti pakannigid ket adda met makasinnabetna isu a nagtalinaed iti linyana ngem natukbobna latta ti motorsiklo.
Gapu iti impact, naipurwak dagiti nagkalubbon iti kalsada ket nagsagrapda iti fatal injuries.
Saan met a naan-ano ti drayber ti trak nga itan ket adda iti kustodia dagiti pannakabagi ti linteg.
