Boluntario a simmuko ti menor de edad a nangbagkong ti maysa nga estudyante idiay Barangay Tamurong 2nd, Candon City.
Ti biktima ket lalaki nga agtawen iti sangapulo ket walo, residente ti Tamurong 2nd, Candon City, idinto a ti suspek ket agtawen ti sangapulo ket pito, residente ti Barangay Caterman, iti isu met laeng a siudad.
Iti pannakiuman ti Bombo Radyo Vigan ken PLT Jovelyn Antalan ti Candon City Police Station, naguyogoy dagiti nagannak ti suspek a boluntario a sumuko tapno saan nga dumagsen ti kaso.
Maipalagip nga agbuybuya ti card games ti biktima iti maysa a natayan idin simmangpet ti suspek ket kellaat na a sinipat ti abaga ti biktima.
Bimmales ti biktima ket dinanogna ti suspek ngem isu metten ti panangasot ti suspek ti kutsilyo iti sikiganna ken induyokna iti barukong ken akin-kannigid nga ima ti biktima.
Gapu dayta ket naipan ti biktima iti Candon City Hospital para iti pannakatamingna ket addan isuna iti natalged a kasasaad.
