VIGAN CITY – Pimmusayen ti menor de edad a mapapati a nagbekkel iti uneg ti pagdagdagusan na a dorm idiay Ayusan Norte, Vigan City.
Tallo nga aldaw a nagtalinaed ti Intensive Care Unit ti maysa a pribado nga ospital ti biktima ket itay laeng mga bandang alas- dyes nga inpakaammo dagiti kameng ti pamilya na ti Bombo Radyo Vigan a natayen.
Immuna iti dayta ket maragsakan ti lola na idi kalman a nangipadamag nga addan iti simmaayatan iti kasasaad ti biktima ta kabaelan nan nga aganges a solsolo na saan a kas kadagiti naglabas nga aldaw a tultulungan ti makina tapnu maka-anges.
Immun-unan nga inbaga ti lola ti biktima a saan a maitured ti apo na iti agpakamatay ta ammo na a natibker iti pakinakem na iti laksid a naggapu iti broken family ta ni ina na ket napan idiay Italy idi innem a bulan na pay laeng ket nakasapul iti sabali nga asawa na isu a saanen a nagaw-awid idinto a ti ama na met ket naki-asawa metten iti sabali idi nadamag na a ni baket na ket naki-asawa iti sabali idiay Italy.
