VIGAN CITY – Im-imbestigaran a naimbag dagiti miyembro ti Sta. Lucia municipal police station nu pudno a nagpakamatay ni Cesar Quila nga agtawen ti lima pulo ket dua, baro ken agnaed idiay Barangay Suagayan, Sta. Lucia wennu aksidente a napaltugan na iti bagi na a poon iti nakatayan na idi alas tres y media iti parbangon idi kalman iti nasao a lugar.
Dayta iti pinasingkedan ni Police Captain Leonilo Ancheta, hepe ti Sta. Lucia PNP iti pannaki-uman kenkuana ti Bombo Radyo Vigan.
Maibasar iti inisyal nga imbestigasyon, mapapati a pinaltugan ti biktima iti bagi na idi parbangon idi kalman ta adda pay nangngeg ni Noli Quila a putok iti paltog iti uneg ti kwarto ti ading na ket idi napan da kinita, napasagen ti biktima a dara-dara ket inpan da iti kaasitgan nga ospital ngem naideklerar a dead on arrival gapu iti sinagaba na a tama iti paltog iti sikigan na.
Pinasingkedan ni Ancheta a kakaidda ti biktima iti paltog na nga improvised shotgun nga agatiddog ti lima pulo a sentimetro a nakita da pay mismo iti nagiddaan na.
Agsipud iti dayta, naidalan ti paraffin test ti biktima tapnu maamuan nu pinaltugan na wennu saan ti bagi na nga isu iti iyur-uray dagiti otoridad iti resulta na.
